Introdussion a Esdra

Ël lìber d’Esdra a 'ncamin-a con le paròle mideme ch’i trovoma a la fin dlë scond lìber ëd le Crònache, visadì la famosa crija ch’a l’avìa emanà Ciro, rè ‘d Persia ch’a consentìa a j’ebreo ch’a lo volèisso fé, d’artorné an patria e ‘d buté torna an pé ‘l templi ‘d Gerusalem (capìtol 1). Ij prim rimpatrià a l’avìo sùbit arfàit l’autar për ristabilì ‘l cult (capìtoj 2-3). Ël templ antregh a sarìa stàit arcostruì motobin pì tard. J’Ebreo, an efet, a l’avìo da soporté l’oposission ëd la gent ch’a l’avìa pijà sò pòst ëd lor durant ël temp ëd l’esili, ch’a l’era stait bin longh. Coste popolassion e ij sò cap a l’avìo sobornà pì ‘d na vira j’autorità contra j’Ebreo rimpatrià. Ël lìber a arpòrta, ant la lenga ufissial ëd col temp, l’aramàich, n’antëressant ëscambi ‘d corispondensa con j’autorità dla Persia. A la fin, l’autorisassion a arcostruve a sarìa stàita confermà, e la riedificassion dël templi solenisà con na selebrassion granda ëd la Pasca (capìtoj 4-6).

La sconda part dël lìber a fà memòria d’aveniment capità vàire dosen-e d’agn pì tard. A parla d’Esdra, në scriba, visadì ‘n mèistr ëd la Lege, ch’a l’era stàit mandà a Gerusalem dal rè ‘d Persia, Antaserse. Esdra a armarca motobin sagrinà che la Lege ‘d Nosgnor a l’era nen osservà, dzortut përchè a-i j'ero stàit tanti mariagi mës-cià an tra Ebreo e ‘d gent ch’a l’era nen ebrea. Chiel a antërven con fòrsa e antërdiss a j’Ebreo ‘d mës-ciesse con d’àutre popolassion: lor a l’avìo da vive isolà, con na fidelità strèita a la Lege (capìtoj 7-10).

Ël lìber d’Esdra, tant coma col ëd le Crònache, a l’é stàit butà ansema ant n’ambient sacerdotal. A l’é motobin antëressant për j’anformassion ch’a conten e ch’a peudo giuté a arcostruì la stòria dla comunità ebràica apress ëd l’esili an Babilònia. Pì ‘d lòn an mostra che për esse fidej a Nosgnor a-i é da manca ‘d na fede pura e n’ubidiensa angagià e rigorosa a la Lege. Dzora ‘d costa dotrin-a as pògia cola fidelità religiosa ch’as ciama giudaism, ch’a dà n’antërpretassion e a tramanda la stòria dël pòpol ebràich coma ch’a l’era passà ant la vita ant n’época pì antica e ch’a l’é l’ambient religios anté ch’as dësvloprà pì tard ëdcò la predicassion ëd Gesù.

Schema

Artorn da l’esili 1:1-2:70
Le vicende dl’arcostrussion dël templi 3:1-6:22
Atività d’Esdra e organissasion ëd la comunità 7:1-10:44