La Bibia piemontèisa/Testament Vej/Daniel/Introdussion

Artorn

---

Introdussion

Ël lìber dël profeta Daniel as divid an doe part. La prima (capìtoj 1-16) a vëdd coma protagonista Daniel e ij sò compagn d’esili che, con soa fede an Dé e l’obediensa a soa lege, a riesso a trionfé dzora dij sò përsecutor. J’aveniment a son colocà a la cort ëd Babilònia, sota ‘l rè Nabucodenesar, sò fieul Baldassar, e Dario dla Media. Da la mira stòrica, contut, coste indicassion a son nen giuste. Baldassar a l’era nen ël fieul ëd Nabucodenesar e Dario a l’era rè dij Persian, nen dij Medi) e a arvelo che l’autor ëd cost liber, ch’a vivìa ant n’época pì recent, a vorìa colochè le vicende ch’a contava ant n’época lontan-a, dont a servava n’arcòrd nen tant precis.

La sconda part (capìtoj 7-12) as dësvlopa ‘dcò ant un perìod lontan (sota ‘l regn ëd Baldassar, Dario ‘l Medi e Ciro ‘d Persia), ma a conten vàire alusion al temp anté ch’a l’é probàbil ch’a vivìa l’autor. A conta ‘d tre vision che Daniel a l’ha avù, pien-e ‘d sìmboj misterios. Dëspiegà ch’a sio, lor a ‘rvelo ‘l pian ëd Nosgnor riguard a j’amperi e a le potense ch’a craso ‘l pòpol dj’ebrèo. Costa arvelassion për ël mojen ëd vision a l’é caraterìstica dl’Apocalìtica (lét. siensa dl’arvelassion). Coste vision a nunsio che Dé a butrà fin a j’amperi pagan e a darà salvassion e vitòria a sò pòpol.

Ël lìber ëd Daniel a l’é scrivù an part an ebràich (1:1-2:4a) e an part an aramàich (2:4b-7:28). La tradussion greca a l’ha giontaje un test poètich pitòst longh al capìtol 3 e doe narassion a la fin (cap. 13-14). Costi sì i l’oma butaje an tra ij lìber deuterocanònich.

Sicom ël capìtol 11 a parla dle guère an tra ij sovran d’Egit e ‘d Siria, ch’a son j’ardité dël Regn ëd Lissànder e dla përsecussion che ‘l pòpol ebràich a l’era stàit sogetà sota ‘l regn dël sovran siriach Antìoch IV Epifàne, cost lìber a dovrìa esse stàit butà ansema ant la prima metà dlë scond sécol A.C. A l’é donca stàit scrivù ant un perìod ëd crisi për ël pòpol ebraich, ël temp anté ch’a l’era vìtima ‘d përsecussion e crasament. L’autor a conta ‘d fàit e ‘d vision con paròle d’ancoragiament adressà a coj ch’a n’avìo la midema fede: Nosgnor a camperà a tèra ij tiran e a ristabilirà la sovranità ‘d sò pòpol.

Schema

• Daniel e ij sò compagn a Babilònia (1:1-6:29)
• Le vision ëd Daniel (7:1-12-13)
• prima vision: le quat bestie (7:1-28)
• sconda vision: ël moton e ‘l boch (8:1-9:27)
• tersa vision: l’òm vëstì ‘d lin - guère e përsecussion
• l’arsuression dariera (10:1-12:13).