La Bibia piemontèisa/Testament Vej/Cronache/2Cronache3

Da Wikisource.
Jump to navigation Jump to search

3[modifiché]

La costrussion dël Templ[modifiché]

1Salomon a l'é ancaminasse a fabriché 'l Templ ëd Nosgnor a Gerusalem an sël mont ëd Morija, anté che Nosgnor a l'era manifestasse a sò pare David[1]. A l'era 'l leu che David a l'avìa prontà ant l'eira d'Ornan, ël Gebusé. 2A l'é ancaminasse a fabriché dlë scond mèis dël quart ann ëd sò regn.

3Salomon a l'ha posà la fondassion dël Templ ëd Dé; soa longhëssa a fasìa sessanta cùbit (scond le mzure antìche) e sua larghëssa vint cùbit. 4Ël pòrtich dëdnans dël Templ a l'era longh vint cùbit e d'autërtant d'autëssa. D'andrinta a l'era tut quatà d'òr pur. 5L' aula gròssa pì amportanta a l'era tuta arvestìa con bòsch d'arsipress, laminà d'òr pur e dzora a l'ha faje dissegné 'd pàlme e 'd feston. 6Costa sala pì gròssa a l'era archincà 'd pére pressiose e d'òr soasì[2]. 7A l'ha arvëstì d'òr ij mur, ij trav, jë stibi e le pòrte. An sij mur a l'ha fàit scurpì 'd cherubin.

8Peui a l'ha fàit fabriché l'àula dël leugh pì sant[3], ch'a l'era tant longa, larga e përfonda: vint cùbit. A l'ha patinala 'd feuja d'òr pur, che a corispondìa al peis ëd sessent talent. 9Ij ciò a l'ero d'òr e a peisavo mincadun sinquanta sicl. Ëdcò tute le càmere àute a son ëstàite arvestìe d'òr. 10Drinta 'l leugh pì sant Salomon a l'avìa fàit scurpì doi cherubin placà d'òr. 11Da banda a banda j'ale dij cherubin a l'avìo vint cùbit ëd longhëssa. 12Minca n'ala a mzurava sinch cùbit e a tocava 'l mur dla sala; l'àutra, 'dcò 'd sinch cùbit, a tocava l'ala dl'àutr cherubin. Dla midema manera n'ala dl'àutr cherubin a mzurava sinch cùbit e a tocava 'l mur; l'àutra ala, 'dcò 'd sinch cùbit, a tocava l'ala dl'àutr cherubin. 13J'ale dij doi cherubin, dëspiegà, a mzuravo vint cùbit: lor as posavo ansima ai sò pe, con la facia sversa për andrinta. 14Ël rè a l'ha 'dcò fàit brodé 'l vel con fij 'd pórpora, chërmisin e damass, andova a l'ero ricamà 'd cherubin.

15Dëdnans a l'edifissi a l'ha fàit drissé doi colòne, longhe trantesinch cùbit, con 'd capitej dëdzora, àut mincadun sinch cùbit. 16A l'ha 'dcò fàit fé ij feston parèj 'd coj dël Santuari e a l'ha butaje dëdzora dle colòne e sent pomgranà, antërsà ant ij feston. 17Coste colòne a son peui stàite butà ant l'andron dël Templ, un-a a drita e l'àutra a mancin-a: cola 'd drita a l'han ciamala Jachin, l'àutra Boas.

Nòte[modifiché]

  1. O "ambelelà andova che sò pare David a l'avìa avù na vision dl'angel ësterminator".
  2. O "ch'a vnisìa da Parvaim".
  3. O "ël Sant dij Sant", "ël (leugh) Santissim".