La Bibia piemontèisa/Testament Vej/Amos/Introdussion

Introdussion

Ant ël sécol ch'a fà eut a. C., ël regn d'Israel, colocà a nòrd ëd col ëd Giuda, a gòd d'un perìod ëd pas polìtica e econòmica relativa. Për càusa dla debolëssa dle nassion ch'a l'avìa aranda, dzortut cola d'Aram (o Siria), chila a l'avìa pa tëmma 'd mnasse da fòra, antant che soe transassion ëd comersi a l'ero sorgiss ëd prosperità. Costa situassion a favorìa la difusion d'un clima 'd sicurëssa ch'a s'arfletìa ant lë splendrior ëd le manifestassion dël cult. La realità contut, a l'era bin diferenta: l'asiansa econòmica 'd pòche përson-e a fasìa dventé pì granda la division an tra le classi sossial; la solidarietà an tra 'l pòpol a mancava e a regnava lë sfrutament dij déboj dai pì fòrt. La corussion a sparniava gnanca ij tribunaj, ch'a dasìo fòra 'd sentense nen giuste anvers ëd coj ch'a l'avìo pa j'arsorse për dësfend-se,

An costa situassion as còloca 'l mëssage dël profeta Amos. Chiel a l'era originari 'd Tecoa, na sitadin-a dël regn ëd Giuda, a sud, ma a l'é ciamà da Nosgnor a prediché ant ël regn d'Israel. Amos a l'è 'l prim profeta, dont ël mëssage a l'é cojì ant un lìber.

Ël lìber a comensa con l'anonsi dël giudissi divin an sle nassion ch'a stan aranda d'Israel, ch'a son colpévoj 'd violense e d'angiustissie. Tutun, ël giudissi 'd Nosgnor a l'é ancora pì sever anvers d'Israel, ch'a l'é 'l pòpol sernù da Dé, ciamà a dé espression a soa grandëssa. Israel a l'ha, donca, na responsabilità precisa, ch'a peul nen limitesse a la selebrassion ëd sirimònie religiose, bele s'a son grandiose (1-3). Amos a fà memoria a soa gent che 'l cult che Nosgnor a agradiss a l'ha da manifestesse an umiltà e giustissia. Dé a l'ha stabilì un drit ch'a peul nen esse scarpisà e chiel midem a l'é col ch'a dësfend ij déboj. Ël giudissi contra Israel a séguita ant ij capìtol 4-9. Amos a prospeta l'avzinesse dla potensa assira che, dël 721 a dëstruerà Samaria, la capital dël regn d'Israel.

Ant j'ùltim capìtoj, ël liber d'Amos an arferiss sinch vision, ch'a son ël simbol dl'avzinesse dl'antërvension ëd Dé. Ël lìber a finiss con n'anonsi 'd salvassion (9:11-15).

Schema

Presentassion 1:1-2
Dé a giùdica ij pòpoj e Israel 1:3-3:2
La mission dël profeta 3:3-8
Nosgnor a condan-a Israel 3:9-6:14
Sinch vision ch'a nunsio l'antërvension ëd Nosgnor 7:1-9:10
Dé a ristabilirà 'l regn ëd David 9:11-15