Introdussion[modifiché]

La Litra a Tito a l’é stàita scrita da l’apòstol Pàul a Tito, un colaborator giovo dl’apòstol, e soa composission a l’é gropà a sò ministeri cristian ant l’isola ‘d Creta an sël mar Egeo (Grecia). Pàul a l’avìa fidà a Tito la responsabilità dë stabilì n’òrdin ant le comunità cristian-e locaj e nomineje ‘d dirigent (ansian o pastor). La data ‘d composission ëd la Litra a Tito a l’é stima apopré dj’agn 63-66 d. C. Cost perìod a l’é col dj’ùltim agn dël ministeri ‘d Pàul e ‘d sò anpërzonament a Roma.

Ant la Litra a Tito, Paul a trata ‘d vàire sugèt ëd pèis:

(1) Nòmina dij dirigent ëd le comunitù cristian-e. Pàul a dà d’istrussion an cole ch’a l’avìo da esse le qualità moraj e spirituaj dij dirigent ëd la Gesia, conossù coma ansian, pastor, o vesco, e coma meinagé le chestion ch’a seurto ant la comunità cristian-a sensa lasesse svarié da discussion inutij.

(2) Condòta cristian-a. L’apòstol a esprta ij chërdent a vive na vita caraterisà da moderassion, ospitalità, bontà e gentilëssa,

(3) Dotrin-a san-a. Pàul a armarca l’importansa ‘d na dotrin-a conform a lòn ch’a l’avìo mostrà j’apòstoj e la necessità d’arfudé ‘d dotrin-e e pràtiche sbalià.

La Litra a Tito, donca, a forniss ëdcò ai cristian d’ancheuj ëd lession pressiose për regolé soa vita comunitària. An ancoragia ‘dcò a arflete an su nòstra condòta përsonal e nostr angagg ant ël moviment cristian e ant le gesie. A l’é na sorgiss e model dël ministeri e dla condòta cristian-a basa a sla fede, la vrità e la santità.