La Bibia piemontèisa/Testament Neuv/Timot/Introdussion
Introdussion[modifiché]
Ël Testament Neuv a comprend doe litre (epìstole) che l’apòstol Pàul a l’avìa scrivù a Timòt, un dij pì vajant an tra ij sò colaborator. Coste litre an fornisso na prospetiva pressiosa an sla vita dle prime comunità cristian-e e an sij prinsìpi ch’a l’avìo da caraterisene l’organisassion e servissi (ministeri) e ch’a resto, a l’é ciàir, ëdcò la nòrma për ij cristian ëd minca temp e pais.
A l’é probàbil che coste doe litre a Timòt a sìo stàite scrite da l’apòstol Pàul an tra j’agn 60-65 d. C. durant j’ultim temp ëd soa atività, cora ch’a l’era stàit butà ‘n përzon a Roma. Timòt a l’era antlora an soa giovnëssa, ma a l’era chërsù coma ‘n chërdent che soa conossensa e saviëssa a l’avìa rendulo degn d’ocupé na posission ëd responsabilità e guida ‘d comunità cristian-e. Timòt a l’é mensionà, an efet, nen mach an coste litre, ma ‘dcò ant ël lìber dj’At dj’Apòstoj e a d’àutre litre ‘d Pàul. La mare ‘d Timòt a l’era n’ebrèa e so pare ‘n grech e lolì a l’avìa daje na bon-a conossensa ‘d costi doi mond ch’a formavo antlora la base ‘d tante comunità cristian-e. L’influensa ‘d soa mare e ‘d soa mare granda a l’era stàita decisiva an soa formassion religiosa e fede.
Timòt a l’avìa peui compagnà Pàul ant ij so viagi missionari e a l’era staje fidà la condussion ëd la comunità cristian-a d’Efeso. An coste doe litre da la përzon, Pàul a-j dà d’istrussion për ancoragelo e guidelo an sò servissi cristian. An efet Timòt a rapresenta n’esempi ‘d fidelità e angagg ant ël ministeri cristian. An particolar an coste litre Pàul a trata ‘d chestion ch’a riguardo la dotrin-a giusta, la condòta dij minister cristian e la përseveransa ant la fede.
Ël minister cristian a l’ha da vardé bin che la dotrin-a apostòlica a sìa mostrà e rispetà con diligensa e che gnun-e idèje sbalià a s’anfilo an tra ij chërdent dë scondion o sota qualsëssìa pretest. Ij minister cristian a l’han ëdcò da dé ‘n bon esempi ‘d vita moral e spiritual. A la fin Pàul a ancoragia Timòt a resté frem ant la fede malgré le dificoltà e le dësfide ch’as incontro an ës mond e ch’a buto a l’arzigh l’esistensa midema del moviment cristian.
An conclusion, le litre ‘d Pàul a Timòt a son un tresor ëd saviessa e ‘d dotrin-a për ij cristian ëd minca n’época e a son d’ispirassion durèivola për coj ch’a serco d’andeje dapress al Crist e a serve l’Evangeli dël Crist ant ël moviment e ant le gesie cristian-e.