La Bibia piemontèisa/Testament Neuv/Tessaloniceis/Introdussion

Introdussion

Le litre (epìstole) ai Tessalonicèis l’apòstol Pàul a l’avìa scrivuje con ij sò colaborator Silvan e Timòt, a la comunità cristian-a ‘d Tessalònica an doe diverse occasion. Pàul midem, con soa predicassion evangelìstica, a l’era stàit ël mojen për lë stabiliment ëd cola comunità an Grecia durant un dij sò viage missionari. As fà stima che coste doe litre a sìo stàite scrite apopré dj’agn 50-51 d. C. e lolì a le rend an tra le prime scriture cristian-e conossùe.

La comunità cristian-a ‘d Tessalònica a comprendìa dzurtut ëd convertì neuv ch’a vnisìo dal paganism. Për càusa ‘d soa fede, a l’avìo afrontà d’oposission e përsecussion. Lolì a l’avìa motobin sagrinaje e as fasìo vàire domande a propòsit ëd la promëssa dl’artorn ëd Gesù e dla vita cristian-a. Për costa rason, Pàul a jë scriv për rinforsé soa fede ‘d lor e rësponde a soe preocupassion.

Ant la prima litra Pàul a passa a l’arvista coma ch’a l’era nassùa la cesa ‘d Tessalònica e a-j làuda për soa fede frema. Ij chërdent a son ancoragià a vive na vita pura e a tnisse a la speransa dl’artorn ëd Gesù. Cora che ‘l Crist a rivrà torna, chiel a arsussitrà ij chërdent e portarà vìa coj che antlora a saran an vita për restè për sempe con chiel. As avzin-a ‘l dì ‘d Nosgnor ch’a porterà la gent ëd cost mond al giudissi final.

Ant la sconda litra Pàul a rëspond a vàire chërdent che, përseguità, as ciamavo se ‘l Dì ‘d Nosgnor a fussa già rivà. Pàul a-j pasia an disend che lòn che lor a na fasìo antlora l’esperiensa a l’era pa ‘l giudissi ‘d Dé. Anans che col dì a riva, an efet, a l’avrà da ess-je n’arvira generalisà dl’umanità contra Nosgnor, ij fren ch’a Dé a l’avìa butà për limité j’efet dël mal a saran gavà e a vnirà al podèj l’Anticrist, ël prinsi ‘d tut lòn ch’a l’é inmoral. Nosgnor, contut, a guernerà ij sò fieuj, ch’a l’avran da përsiste a fé lòn ch’a l’é giust.