La Bibia piemontèisa/Testament Neuv/Galat/Introdussion
Introdussion[modifiché]
La litra (epistola) ai Galatian, scrivùa da l’apòstol Pàul, a l’é un dij test ij pì significativ dël Testament Neuv. Adressà ai prim cristian ëd la region ëd la Galasia, ant l’Asia Minor (la Turchìa d’ancheuj) costa litra a l’é na pera miliar ëd la teologìa cristian-a. Soa composission a l’é apopré dël 49-55 d. C. e lolì a la rend un-a dle prime scriture cristian-e conossùe.
La litra as doverta con na salutassion tìpica ‘d Pàul, ma apress as dësvlopa ant un-a discussion ancreusa an sla dotrin-a cristian-a e an sla giustificassion për ël mojen ëd la fede an Gesù Crist. Pàul a l’era sagrinasse che ij cristian ëd la Galasia a l’avèisso chità la fede cristian-a artornand a le pràtiche ebràiche, e parèj a scriv costa litra coma n’esortassion a resté fidej a la dotrin-a dël Crist.
An costa litra Pàul a dëspiega l’idèja crosial ël la giustificassion për ël mojen ëd la fede, armarcand che la salvassion a peul nen esse ganià da nòstre euvre (nòstra ubidiensa a la Lege ‘d Dé, gnanca mach an part), ma ch’a l’é ‘n don ëd Dé, che chiel an dà sensa ch’i lo mérito. Cost tema sentral ëd la litra a l’ha avù n’antruch përfond an sla teologìa cristian-a e a l’ha marcà na distinsion ciàira an tra Lege e Grassia ant la fede cristian-a.
Antlora, ëd magister fàuss a l’ero anfiltrasse ant le comunità cristian-e dla Galasia. A disìo che, për che la salvëssa a fussa génita, nòstre euvre meritòrie d’ubidiensa a la Lege (an particular la sirconcision) a l’avèisso da esse giontà a la fede an Crist. Pàul a condan-a ciàir e net la mës-ciada ‘d Lege e Grassia e a mostra coma la salvassion e la santificassion a sio mach l’euvra dla grassia, visadì ‘d lòn che la përson-a ‘d Gesù a l’ha compì për nojàutri. A l’é mach la Grassia an Crist ch’a l’ha liberane. Noi i contoma mach ant l’euvra dlë Spirit, pa nen an lòn ch’i foma o podrìo fé nojàutri.