Introdussion[modifiché]

Le doe epistole ai cristian ëd Coint a son doe litre scrite da l’apòstol Pàul a la comunità cristian-a ëd Corint, na sità antica ch’as treuva ancheuj an Grecia. Ij savant a son ëd l’opinion che coste litre a sio stàite scrite an tra j’agn 54 e 56 d. C. durant ël perìod anté che l’apòstol Pàul a stasìa a Efeso, na sità dla Turchìa d’ancheuj. Efeso a l’era n’important sènter ëd coltura e ‘d comersi dl’época, e Pàul a l’avrìa podù scrive cole litre da lì, sicoma chiel a seguitava d’esse an contat con la comunità cristian-a Corint che chiel midem a l’avìa fondà, e për arzolve ‘d chestion e ‘d problema ch’a l’ero seurtì ambelelà.

La prima litra ai cristian ëd Corint a son an tra ij test ij pì important ëd caràter teològich e pastoral che Dé a dovra ancora ancheuj për afronté na série ‘d chestion tìpiche ch’a riguardo la vita e la fede dij cristian. La litra a discut ‘d chestion moral, ëd division ant la comunità, dla significassion ëd l’arsurression dël Crist e dl’amor cristian. Ël but ëd l’Apòstol a l’era d’amaestré e corege la comunità sercand d’arzolve ij contrast ch’a-i ero e dë stimulé l’unità an tra ij chërdent.

La sconda litra ai cristian ëd Corint a l’é pì përsonal e a arflèt le dësfide e le emossion ëd Pàul coma apòstol. An costa litra Pàul a dësfend soa autorità apostòlica e a parla ciair an sle dificoltà ch’a l’ha patì durant soa mission. A armarca l’importansa dla grassia e dla fòrsa ch’a dà Nosgnor për vince le debolësse uman-e.

Tute doe coste epìstole a dan d’amaestrament pressios për la vita cristian-a, la vita an comunità e la relassion an tra divin e uman. A son leture ‘d pèis për comprende mej ël pensé e la dotrin-a magistral ëd Pàul e ‘l contest ëd le prime comunità cristian-e.