La Bìbia piemontèisa/Testament Neuv/Giaco/Introdussion
Introdussion a la litra ‘d Giaco[modifiché]
Costa litra, o epìstola, a l’é atribuìa a Giaco, ch’a l’era un dij dirigent ëd la prima comunità cristian-a ‘d Gerusalem, e ch’a l’era considerà ‘l frel ëd Gesù. Costa epìstola a l’é scrita ant në stil dirèt e pràtich, con ëd consèj e d’amaestrament ch’a l’han ël but ëd guidé ij chërdent ant soa vita ‘d minca dì.
Për lòn ch’a riguarda soa data ‘d composission, l’Epìtola ‘d Giaco a l’é stàita scrivùa an tra ‘l 45 e ‘l 49 d. C. Lolì a la rend un dij prim ëscrit cristian ant ël Testament Neuv.
L’epìstola a trata ‘d vàire sogèt ch’a son ëd pèis pr’ ij cristian. Giaco a parla ‘d chestion tanme la fede e j’euvre, armarcand l’importansa ‘d buté an pràtica lòn ch’as chërd, A cissa ij letor a dimostré soa fede ‘d lor con d’assion d’amor, compassion e ‘d giustissa anvers ëd j’àutri,
Giaco a discut ëdcò ch’i l’oma da esse responsabij ‘d lòn ch’i disoma, a vardesse da comportesse coma ‘d lengasse e dai discors ch’a son dësutil e ch’a fan dël mal. L’epistola a trata ‘dcò dla richëssa e dla povertà, anvitand ij chërdent a esse equilibrà ant soe atitudin anvers dij beni materiaj.
Finalment, la litra ‘d Giaco a trata dla përseveransa cand ch’i l’oma da soporté ‘d preuve e ‘d dificoltà, e a l’é n’esortassion ai chërdent a resté ferm an soa fede bele s’a l’avèisso da patì ‘d sagrin.
An sìntesi, l’epistola ‘d Giaco a l’é ‘n test rich d’amaestrament pratich e moraj për ij chërdent. A dà ‘d consèj su la fede ativa, coma ch’i l’oma da dovré le paròle, an sla giustissia sossial e an sla resistensa ant le dësfide dla vita.