Graziano Selvo/Mè cé Carlin

Mè cé Carlin

Ij pé 'mt ij soco, an boca un fil ëd paja,
sta seuliandse barbis e sentijon:
Carlin, mè cé, s'arloja al sol su 'n bion
la schin-a pontalà a la muraja.

Gura dabin soa fuma co 'l trancèt,
soa fuma nèira, veja, companìa
dle sèire passà lògn da la famija,
an Fransa, a la minera, sol solèt.

Adess ël tempo lo arpaga an abondansa
dij sacrifissi, dle vitasse dure,
fasendje dësmentié le giornà scure
con ël cadò dla pas e dla sapiensa.