Giusep Gorìa/Nietschian-a

Nietschian-a

A l'era d'invern ma la Prima 'd Grieg
a fasìa pì ciàira la lun-a dzura
ël bon setsent ëd Palass Carignan.
Ti it la vardave sghijé vìa an tra
le nìvole àute che a la maciavo
ëd làit e 'd perla e it bautiave j'euj
an sle curve baròche.

Fòrse - is disìo - i soma stàit pr' un àmen
an sla brova dël Savèj d'un alman
solengh fërmasse sì ant l'ëscalabrun-a
ëd soa stagion.