Giovanni Delfino/Sercc d’aria reusa
Sercc d’aria reusa[modifiché]
J’euj reusa dle colombe
a son giajètt da cheuje
për anvlupé ‘nt le feuje
‘d reusa.
La smens giàuna dla reusa
a l’è un tabach da cheuje
për anvlupé ‘nt le feuje
‘d menta.
Una ramëtta ‘d menta
l’è un bastonin da cheuje
për sopaté le feuje
‘d reusa.
Le feuje ‘d reusa a lasso
robaté ‘d cite greuje:
cucionilie con pleure
‘d reusa.
Le cucionilie reusa
al sol a taco a beuje:
Colombe tra le feuje
ai bëcco.
E, ‘nt un sercc d’aria reusa,
torno a fissé le fior
euj ‘d colombe an amor:
euj reusa.