Gioanin Marietta/L'agitassion dël copion

L'agitassion dël copion

A lë scur, ansima ’n cadregon,
i serco la concentrassion
për dé ’l màssim ant la recitassion,
con an fàuda mè copion.
A passo j’ani e le stagion,
ma sempre un pòch d’agitassion
a distorba l’atension
dl’ùltim contròl dël copion.
A j’é cheidun, là ’nt ël canton…
pì che mi a sent l’emossion:
man an sla pansa për fërmé ij torzon,
facia smòrta… color dël limon.
La luce a sbaluca, là, an mes a l’assion,
ma sì da daré as ved gnanca ’l copion…
L’odor ëd la póer a gatija ij polmon…
A sarà na figurassa… o un figuron?
Dòp tante sman-e ’d tribulassion,
preuve, telefonà, progetassion,
studié ij costum, adaté ’l copion,
sèire e di ’d festa përdù an preparassion…
Speroma dë riesse a tir l’atension:
se nen le rijade, un pò ’d compassion…
Che spussa sta giaca comprà an sël Balon!…
Sa, fame dé ’ncora n’uciada al copion…
Macchè, pa pì temp… a toca a mi… i soma al bon…