Gioanin Magnani/La piòla

Artorn

---

La piòla

Tre scalin, na pòrta 'n pò scrussìa
ch'a ciochinava a l'intré 'd cheidun;
un vej bancon, në scafal con cheich burnìa,
cadreghe dëspajà, taolin... tant fum.

Muraje grise... na bòja... na furmìa,
un "gris-verd" a l'ovrié, un "chinà" al "grum",
për le masnà ij "cicless" fàit a bija.
Un soris e un bicer negà a gnun!

Piòle d'una Turin dal cel seren:
piòle che ant le muraje dëscrostà
a guernavo le amicissie; nen ël velen

ma la batúa alegra dël "somà"
'nt un piemontès genit ch'as sent pì nen!
Malincònich arcòrd d'un temp passà.