Gianni Porru/Stòria 'd misèria
Stòria 'd misèria
[modifiché]Fà ch’arpòso ’n pas
coste gent... Signor,
sì... sota coste pere bianche
ant ël camposanto neuv.
Fà ch’a deurmo l’etern arpòs
sota toa lus eterna,
con le stèile e ’l sol
mentre la lun-a a guerna.
Tant che ij pivi a canto,
la glòria Toa, e la grandëssa,
ij miràcoj... a sucedo ancora
fra coste pere bianche.
Ma lì... ant un canton,
na pera grisa e spòrca,
sensa fior, a parla ’d povertà,
con na vejòta ch’a prega an ginojon.
Arcòrda jer... coma un passà trist,
con na sòrt grama... ëd pior
quand che un partì brajava
e detava... soe condission.