Gianfranco Baron/L'àutra fàcia dla midaja
L'àutra fàcia dla midaja
[modifiché]Për na vita fàita ’d sacrifissi
e temp për fé mach alenament
na dieta san-a e pa gnun vissi
a l’é ’l segret për col moment.
Ora a conta col metal ch’a lus
për rivé a la fin a-i va costansa
la veuja ’d vive sensa spatuss,
ël rest, a l’ha pa d’importansa.
Ma peui... coj gieugh a finisso,
e tuti ij tò seugn a torno ’n tèra
ëdcò volé àut a vòlte a patisso
sij làver at resta la boca amera.
Al mond la vita che i vivoma,
soens a l’é ’n camp ëd bataja,
e për col impegn che i-i butoma
a-i é gnanca ’l piasì dla midaja.
Ij sacrifissi son a vòlte pressios,
ma për noi vej, oramai ’nt la stòria
coma al sòlit a të sghijo silensios,
an daran cola midaja a la memòria.