Gianfranco Baron/Ël sal ëd la vita
Ël sal ëd la vita
[modifiché]Chërdije: masnà che davanti a ti a-i é l' avnì
ansios ëd core ël temp ch’a passa di për di
ant j’ani ch'at vòlo via giojos ant un sospir
le còse bele son lente, a bzògna speté sò gir.
Chërdije : giovinot e va pura për ël mond
ma pòrtete tò seugn sarà ‘nt ël profond
e forse, chi lo sà, cosa ch'at riserva la vita,
ëdcò sensa penseje, se a l’é la stra pì drita.
Chërdije : òm, e seugna, che sugné l’é bel
et tute cole goj ch' at pieuvo giù dal cel
a son ant l’amor d’un moment ch’at lasso
ël savor dël sal sij laver, antant ch’a passo.
Chërdije: vej, che na pianta robusta e drùa
a-j basta un colp ëd tron e a resta patanùa
ma se la miola a l’ha ël sal dla vita ‘nt ël cheur
artornerà con tuti ij di pì bej ëd sol ëd boneur.
Crërdije pa: ch' at basta alvesse a la matin bonora
për risolve ij tò problema: a venta chërdìje ancora.