Giampiero Cavarero/Na vòta

Artorn

---

Na vòta

Nòsti vej,Dio a j’ábia an glòria,
a vivìo an certe ca
che a contélo a smìja na stòria
tant ch’a j’ero mal rangià!!!

Le muraje fàite ‘d pera
E për fnesta un purtusin
Con la stala da darera
E la drugia lì davsin!!!!

E për tera pà ‘d pianele,
né ‘d piture ansima ij mur….
A j’era pòche còse bele
E ‘l travaj a l’era dur!!!!

Ma, ant le feste gròsse
A marciavo a testa drita
Drinta cola muda ‘d nòsse
Ch’a durava për na vita!!

Peui,da invern,a së stalavo
Con le vache e un cit lumin
E parèj a së scaudavo
Al tëbbior ëd sò cantonin!!

Noi i rioma ‘d costi vej,
i dëspresioma ij temp passà…
ma na vòta a l’era mej
sensa tanta novità…….

Nòste ca a son come ‘d greuje,
venta pa fé ‘d rabadan,e,
se at’ëscapa certe veuje,
at sento fin-a a l’ùltim pian!!!!

Noi i l’oma ij gust pì bon…
Gnente drùgia danans a ca
Però,drinta dij polmon
I l’oma ‘l fum ëd le sità!!!

Nòsti cit a s-ciàpo tut,
e le fomne…lassomije sté,
ch’a l’han sempre ‘l vardabrut
e queicòs da polide’………

E se mai,la fiòca as bassa
Noi vardoma ij radiator
Che a son frèid come la giassa
e seugnoma con dolor

col bel feu ch’a s-ciopëttava
alegrament ant un canton
e la vita ch’a passava
sensa mai tanti magon!!!

Noi i vivoma ‘l temp modern
Ant ca bele e tapissà
Ma soma fasse un cit infern
Prima ancor d’esse s-ciopà!!!!!