Gemma Cattero/Përchè

Da Wikisource.

Artorn

Perchè[modifiché]

Mut a l'é 'l bòsch ëd neuit
tuti i'osej a taso
gnanca pì 'l cioch dla neuit
as sent fé: "cioch"!
Che dròlo! La sivìtola
vijòira dl'agonìa
al ciair dle ca a s'avzin-a
andoa 'n malavi a vija
peui së slontan-a
sensa pì fé sò crìj...
e 'l cianavel servaj
a l'é spërdusse
tra ij ramagi e ij ronzé...
l'ultima volp a piora
stërmà 'nt soa tan-a...
Son mach pì ij passaròt
che quand la neuit a meuir
tra ij brass ëd l'alba
paréj dij francescan
anton-o 'l matutin
a diso 'l Bin...
J'erbo vej dla boschin-a
frissonand a bësbìjo:
" Saralo colpa dl'òm
ò n'influss malefich
a l'ha anfetane l'aria?"
La gent sa nen përché
ma le bestie a lo san
e a l'han ëd crussi...