Gemma Cattero/Madòna dël Ròciamlon

Da Wikisource.
Jump to navigation Jump to search

Artorn

Madòna dël Ròciamlon[modifiché]

A Sant’Antonin ëd Susa, da banda dla cesa parochial, ant n’anchërna arlongh a la stra prinsipal, da nen tant temp a-i é na statua dla Madòna dël Ròciamlon. As capiss ch’a l’é pì cita ’d cola ch’a onora la sima dla montagna, tutun a l’é na còpia përfeta e donca a l’é n’ocasion dàita a tuti coj ch’a peulo pì nen ’ndé fin-a lassù o për ij gargh ch’a l’han la pansa mòla ’d portè n’omagi a costa Madòna ch’a l’é protetriss ëd la comba ’d Susa. Na vos anciarmanta e ’mportanta a l’é alvasse da cost pais për saluté costa Madòna dasendje ’l bin – ëvnù dovran la fòrsa dla poesìa che soens a sà dventé ’dcò preghiera.


Madòna dël Ròciamlon
stassèira noi voroma
parlete an confidensa...
ma prima ’d tut duvoma
dije ’n bel grassie ’d cheur
a chi a l’ha ’nvitate
a vnì a sté sì
pròpi davzin a noi
e ’n grassie càud a Ti
ch’it l’has rëspondù «Sì»!
Come a l’avran
plasmate bin...
Come iT saras bela!
Le pere ’d toa montagna
già a son sì al pian...
për fete companìa
e da sostegn
an mes a nòstra val,
già sì a sant’Antonin...
Sì Ti ’t saras Regin-a
e nòstra Mama...
Regin-a dle famije,
goerna dle masnà
e fà che an tute le ca
l’amor a regna...
Slarga toe man an sij giovo
ch’a marcio vers l’avnì
noi j’afidoma a Ti!
giuta tuti j’ansian
e ’dcò ij malavi
ch’a spero an Ti!
Sosten costa Coral
ch’a pòrta pròpi ’l nòm
ëd Toa montagna,
l’é nà a Sant’antonin....
giutla a mantense unìa
e semper a vorèisse bin....
Regin-a dla speransa
protegg ’dcò tuti noi
ch’i soma sì present
ëd përson-a...o mach con la ment.
Madòna dël Ròciamlon
noi soma sì ai tò pé...
për dete ’l bin-ëvnùa!
Sia lauda a Ti!

Gemma Cattero
Sant’Antonin 2007