Gemma Cattero/Al Màgister Andrea Olivero

Da Wikisource.
Jump to navigation Jump to search

Artorn

Al Màgister Andrea Olivero[modifiché]

(Collaboratòr Vicari, con fonsion ëd Diretor Didattich a Condove –Otober 1979)

L’ha cambià muda st’ann
ël Diretor Vicari;
cola dij boton d’òr
ven ardrissà ‘nt l’armari
con ën sachet ëd canfora
pendù al pòrtamantel
për sbërgiaré le camole
ch’a l’han rusià ‘l servel!
Për via ‘d soa fonsion,
vlo diso an confidenza,
l’ha le sacòce pien-e
dla smens ëd l’esperiensa,
e adess la muda a médita
mentre ch’a sta ardrissà
ch’ògni moment ëd gloria
purtròp l’è sta pagà…
Pagà con na moneda
ch’a val ëd sacrifissi,
sensa conté mai j’ore
passà lagiù ‘nt l’ufissi
trames a le scartòfie
ch’a sento ‘d protocòl
doa un, për “drit” ch’a sìa,
a smìa ‘d diventé fòl…
Con tut che nòst Vicari,
giugand”zighin-zighèt”
con soa diplomassìa
savìa tiré ‘l carèt.
Ma adess, an conclusion
se i soma ‘d bon amis,
a nòm ëd tuti, ën gràssie
e a Chila, Diretris:
ën bel bochèt d’auguri,
ch’as pija varda ‘d maj,
andand tuti d’acòrde
sarà ‘n profit ‘d travaj!