Fulberto Alarni/Roma e 'l Canavèis

Da Wikisource.

Artorn


Roma e 'l Canavèis[modifiché]

Roma, sicur, l’é la sità grandiosa:
Ruvin-e colossaj, gran monument
– Spléndid avans d’un’epoca gloriosa –
An fan resté ‘ncantà tuti ij moment.

E còs na diom-ne ‘d Roma religiosa?
San Pietro e ‘l Vatícan, cese e convent
An parlo al cheur la lingua portentosa
Dij nòstri gran artista dël sincsent.

Roma! sicur … ma a-i é ‘n pcit cantonet
Lassù ‘n sij brich, sota ‘l soris dël cel,
Ben pì grassios, tut fresch, con ‘d bon vinet,

Con ‘d fomne an gamba e d’òm ch’a tramblo nen …
Oh mè pcit Canavèis, com it ses bel!
Oh mè bel Canavèis, com it veuj ben!