Dumini Badalin/Për Anneliese Kappler

Artorn

---

Për Anneliese Kappler

 

A l’han posate le fior an sl’uss ëd ca
e a l’han batute le man ij consitadin
për col ambreuj che ti e ij tò amis alman
giutà da j’arnegà nostran
i l’eve fane da drito.
Se l’han portave ’n patria ’l sassin
profitand ëd le ferie dj’Italian
ëd coj-lì ch’a dovìo tenlo d’euj
e che ora a son lì ch’a sgambito
për capì come ch’i l’eve fàit,
a tut ancheuj tò govern a séguita
a sté ciuto e tanti a tò pais
a rijo sota ai barbis.
A peulo rije fòrt, dijlo ai tò frej alman
che tant a j’italian ancheuj
a j’anteressa pì nen ëd savèj
lòn ch’i l’eve fàit.
L’eve spuvà an sij nòstri mòrt
ti e coj ch’a l’han date na man,
sòn i l’eve fàit.
Ma come i l’eve falo a n’anteressa pa pì.
Ancheuj a nojàutri italian
a tuti nojàutri italian
ch’i soma batusse për la libertà
ch’i chërdoma ant la dignità
e ’n coj valor uman ch’an fan sivij
costi eut di ch’a son passà
dal di dl’ambreuj
a son stane assé për capì e capì bin
che a nòstr pais a-i é ancora dj’arnegà
ch’a son ancalasse a paré, a coaté, a giuté,
a cudì an tute le manere tò sassin,
col bel sassin che grassie a lor-sì
it l’has podù porté a ca.
Për sòn ancheuj, come i l’eve fàit
a n’anteressa pa pì.