Cesare Filippi/Ël Botonin

Da Wikisource.

Artorn

Ël Botonin[modifiché]

Le fior dl’otóber son già dësfiorìe
e ij vej erbo a goardo sagrinà
ël bel giardin che për tuta l’istà,
a l’ha arlegraje con soe preus fiorìe.
E antant as pronto a la longa invernà
barbotand ëd ringret për ël temp passà.

Ma ’n mes a cola ambrun-a ’d vej rupì,
da un busson ëd reuse andàit squasi a rabel,
a fà babòja un botonin novel
ch’anlumina tut con sò rije ardì.
E coj arbron ansema al bel giardin,
arsauto ’d gòj vëddend col birichin.