Carlo Gallo/Nosgnor

Da Wikisource.
Jump to navigation Jump to search

Artorn


Nosgnor[modifiché]

Ma ’l pì grand ëd j’inventor
sarà sèmper Nòstr Signor!
Spassëggiand un di a temp pers
a t’anventa l’Univers!

Dësmorandse con ël paciòch
at fà n’òmo con ij fiòch,
peui, gavandje na costà
a scolpiss la soa metà

e a-j prepara, vis nen vis,
un fiamengo Paradis!
Con ëd bestie ’d tuta rassa,
da giardin, d’alògg, da massa,

dal pavon fin-a al serpent.
Rivà lì l’é quand ch’as pent,
përchè Eva, birichin-a
un-a grama a-j na combin-a!

Fà travonde a sò Adam
che, bonòm, a l’avìa fam,
na fruta savurìa
ch’a l’era proibìa.

E alora Pare Etern
l’ha creane ’dcò l’Infern.
Tut an càusa, lon as sà...
ëd col balòss d’un pom granà!

Carlo Gallo. Da «Chicchirinade» ëd Galucio