Carlin Porta/Ciabra anciarmanta

Ciabra anciarmanta

Ant ël silensi tranquil
ëd la prima matinà,
ant un bris moment d’arlass
sël plian con i’euj ciupì,
i l’hai sentù ‘d bòt an blan
un consert, squasi na ciabra,
ëd ciusionada ‘nciarmanta
d’osej a fé soa obada
come s’a fèisso ciambrea
vajanta, tuta për mi.
- Sent che argal, sent che gòj -
dun-a i son dime tra ‘d mi,
- Lor a ciusion-o a la prima
con le noanse fiorìe
ch’a blago la matinà
tant ‘me s’a vorèisso di:
duverta le fnestre al mond
che noi soma si për ti -
Nen passà ‘l temp d’un pensé
ch’a son andasne për sò destin.
Dëlcò mi i son surtì
për gòde tuta natura
e vempime j’euj ëd bej color.