Bambin 2020[modifiché]

Miraco a-i nassrà na domanda neuva
ant la ment ëd le masnà për Natal
cand ch’a devo scrive la litra bela
al Bambin coma ch’as fasìa ’n temp.

Con tut cost batibeuj ëd maladìa
ch’a no pòrta mach a vardesse ’nt j’euj,
ch’a no fà sté leugn un da l’àutr an gir,
anté ch’a pos-rà ’l pachèt dël cadò?

A rivrà ’dcò Chiel con la musaròla,
a sgnacrà ’l boton dël ciochin ëd ca
e coma ’l coré a lo pos-rà lì
bel-bel a la sosta dla pantalera.

Bela fantasìa la mia ancheuj,
ma ch’a l’é piasume torné masnà
con la litra fioragià al Bambin
da buté sota al tond ëd mè papà...

Che ’d ròbe
Che ’d ròbe an cost ann bisest da ciamé
al pòver Bambin ch’a ven taja fòra
dal vej bon Talin ëd la barba bianca
e dal tòni ross bon ben ambotì.

Serenità franca ’nt la ment ëd l’òm
për ch’a peussa pijé ’d pét ij sò maleur
che belavans a l’han crasà la vita
portand ëd sagrin gròss a tanta gent.

Consiensa ’d comportament sensa pressa
për amboché la carzà dël bon sens
tornand con bel deuit a la sempia vita.

Chité ij dròlo spatuss, gòle ’d savon,
pregheLo che tut a peussa arsanesse
e, vardandse ’nt j’euj auguresse ’d bin.