Carla Bellato/Ant ël biondì dl'amson

Ant ël biondì dl'amson

Ant ël biondì dl'amson
ël vent ant un arbuf
sbardela sò ciuson:

"L'amor për mi a l'é
fiorì la goj dël vol
d'un parpajon sens'ale"...

La tèra lì da bass
vestìa nèira 'd deul
ant un frisson tërmola:

"Un gest pietos ëd bin
l'é 'dcò soagnesse ambrass
për nòst fratel ch'arpòsa"...

...Dal càles d'un papaver
le lerme dla rosà
a colo 'n ël rì tërbol

'me candi slans d'amor.
Pì 'n là 'nt un pilonet
ël feu dë dnans la Cros

fidel a Jë s-ciuplin-a
soa gòj 'd brusé 'd grinor...
Ant ël biondì dl'amson

i l'hai ciamaje al gran:
"Për ti, cos' é l'amor?!"
"Bëschì dal vòl dël vent

strompà për man ëd j'òm
con umiltà, mei spi
as lasso sfërvajé...

e për virtù a dvento
Ël Pan d'Amor për tuti".