Bruno Giovetti/Carlo e Piera al Carrefour
Carlo e Piera al Carrefour
[modifiché]A ven-o longh dla sman-a
ch’a-i é meno confusion
core a val nen la pen-a
tant ormai a son an pension.
«Varda, Carlo, ël tre për doi
an sël bonèt ch’a l’ha ’l limon
pròpi col ch’an pias a noi»
«Pijlo, Piera, ch’a l’é bon!».
La mnestrin-a marca «un»
cola-lì ch’a costa pòch,
doi caussèt ch’it n’has pì gnun,
na galin-a fàita a tòch.
Për lor aniversari
Carlo pija l’ocasion,
a seurt fòra dai binari
con na bota ’d col pì bon.
A la «cassa» a-i va Piera,
Carlo a rangia tut da bin,
a saluto la cassiera
e a contròlo lë scontrin.
Peui as na van, tui doi a pé,
a bërbòto un pòch tra ’d lor:
«Carlo, sent, se ’t lasso sté
të më sveuidi ’l Carrefour!».