Bianca Dorato/Chitme pa

Artorn

---

Chitme pa

Chitme pa, ti, ant sa longa ora seiran-a
chieta ch'a ven: mi it ciamo, ti, sorìe
grinos dël dì, ti, lus che anco' it bëstante
sla trà 'd fiòca, sënisia dlë s-ciandor.
Mi it ciamo, e it fërmo: e a son ciairor ij camp
largh ëd sa pian-a armeuj ëd nebia s-ciassa,
anroà 'd bëcche leugne che mi i susto,
che i viso e i vëddo pa, e d'amor am bruso;
ciairor ij vieuje j'òrt pasià 'd silensi
davzin a mi, e 'l tërmolé dl'arbrera
nùa; e mè cheur, che ancora 'd ti as arpata
e a canta gòj ant l'ora dla sombrora.