Bianca Barbero/Ëdcò le fior

Ëdcò le fior

Ëdcò le fior l’han sarà ij làver
or che otóber l’é anviarà.
A-i é ’n gir un përfum doss
ëd castagne brusatà.

L’é anviarasse otóber frèsch,
a schërzin-o già le feuje,
feuje sëcche ’nt ij senté

’me ’d canson un pò mineuje.
’Me ’d canson un pò meusie e dròle,
’me ’d castagne brusatà,

sto përfum ëd fin d’otóber
l’é n’arciam ëd la veja ca,
quand le fior a saro ij làver.