Beppe Burzio/Islam
ISLAM[modifiché]
"Assion Piemontèisa", Novèmber 2001
Abul Kasim ibn Abdallah el Mohammed, për j'amis Maomet e pro, a l'era nassù a La Meca, dël 570 ëd l'era cristian-a.
Da giovo a l'avìa fàit, për ësvarià ani, ël conducent ëd gamej; dòp a l'era intrà al servissi, coma sovrintendent, ëd na vidoa motobin ësgnora, Cadigia, che peui, për samblé pì da bin soa posission, a l'avìa fàit ëdventé soa prima fomna.
Arlongh ëd le longhe dëstraverse an sle sabie afoà dël desert, arzigosament cacì fra le gheube ondulante dël gamel, an essend bin anteligent, còs'i vorerijne mai ch'a feissa për passé 'l temp dël viagi?
Ma a pensava diane!
A pensava e a gobolava, e peui a tornava a pensé e a gabolé da l'achit.
E a l'é da tut col pensé e gabolé ch'a j'ero nassùje ij prinsipi dla neuva religion anventà da chiel: l'Islam.
Dël 610, a quarant'ani, a La Meca, a l'avìa tacà a prediché. A l'é ciàir che soe prediche a na popolassion formà da 'd cristian e, për la pì part, da ebreo a l'avìo procuraje sì tanti amis, ma 'dcò autërtanti nemis e, për sòn, a l'era stàit përseguità, tant che, dël 622 a l'avìa dovù scapé an arfugiand-se a Yathrib, sità a la qual chiel a l'avìa cangiàje 'd nòm an batiandla Medin-a.
Costa scapada, che ij musulman a ciamo Egira (emigrassion) a ven considerà coma la nassensa dla religion maometan-a che, an efet, a conta j'ani pròpi a parte da col 622, quand che l'Egira a l'era 'ncapità.
A Medin-a Maomet a l'avìa arpijà a prediché.
Dzortut la guera santa a j'infedej, ma 'dcò a deteje a j'anlev i sò prinsipi, arcujù ant ël Coran, ël lìber sacher ëd la religion islamica.
Quand che ij sò dissepoj a j'ero stàit an nùmer basteivol, a l'avìa tacà a sotmëtte e a convertì le tribù dj'anviron. A l'é con cost sistema che la potensa dij maometan a l'era chërsùa, tant che, ant ël 630, a l'avìo podù conquisté La Meca. Da col moment, bele se dël 632 Maomet a l'era mòrt a Medin-a, l'Islam a l'ha pijà l'andi e a l'ha 'ncaminà a spantiesse ant ël mond.
Bin an pressa a son ëstàit conquistà a l'Islam tut l'orient median, fin-a ai confin con l'India e la Cin-a, tuta l'Africa dël nord, e, dël 711, con la guida ëd Tarik Ben Ziyad (ch'a l'ha dàit sò nòm a Gibiltera, Gebel al Tarik - mont ëd Tarik) a l'avìo sotmëttù la Spagna e la Sicilia, ch'a son ëstàite sot la dominassion musulman-a, an tut o an part, për setsent ani, fin-a al 1492.
An pì che l'abandon pì complet a la volontà divin-a, ch'a l'é propi 'l significà d' "Islam", la religion maomentan-a a l'ha sinch prinsipi fondamentaj, ch'a son: la profession ëd fé, la preghiera, la limòsna, ël digiun e 'l pelerinagi a La Meca.
A l'ha 'dcò tante proibission (vin, usura e an-magin) e d'àutri prinsipi secondari che contut a son nen acetà (antramentre che ij fondamentaj si) da tute le sete ant le quaj a l'é dividusse ant ij sécoj la religion islamica.
Pròpi coma ch'a j'ancapita ant la religion cristian-a, andoa ch'a-i son ëd diferense bin ciàire fra catòlich, ortodòss, còpt e protestant. Coj che, ant l'Islam, a aceto an tut e për tut, e sensa riserve, tuti ij prinsipi dël Coran a son j'integralista, o fondamentalista s'i veule; coj ëd Bin Laden, ant na paròla.
Tuti ij moviment d'ideologìa sossial, con le religion an testa, a deuvro, për ëspantiesse, la violensa.
Con na gròssa diferensa fra cristianesim e islam.
Ël cristianesim a deuvra la violensa passiva subìa dai cristian martirisà, antramentre che l'islam a deuvra la violensa ativa, cola praticà dai maometan anvers j'infedej.
A sta mira a l'é mej fé d'esempi. Tute le comunità uman-e as dan ëd regole për gestì la vita an comun.
Regole ch'a peulo esse giuste o sbalià e ch'a son nen acetà da le religion, o dai moviment ideològich, ch'a nasso, convnù ch'a nasso pròpi për modifiché 'l model ëd vita esistent.
Antlora ij cristian a 'ncamineran a pratiché la disobediensa sivil anvers a le regole dla comunità, a na subiran le conseguense, da la përzon al martiri, e coste conseguense a faran chërse l'aprovassion e 'l grinor ant ij sò confront da part ëd la popolassion agnòstica e, con l'aprovassion e 'l grinor, a chërseran ij neòfit fin-a a argionze la magioransa. Ant l'istessa situassion ij maometan as comporteran an manera bin bin diferenta. A creéran ant la popolassion ëd cola comunità na situassion ëd teror e sparm con violensa e omissidi an tratand, për contrast, pì che bin ij coreligionari e portand parèj la gent a conclude ch'a l'é motobin pì sigur esse maometan che contrari, e cola comunità, an pòch temp, a dventerà tuta maomentan-a.
Costa a l'é la tatica adotà fin-a da l'achit: an meno che sent ani da l'Egira ij maometan a l'avìo conquistà tuti ij pais che, dàit ij temp, a l'era umanament possibil conquisté, e la midema tatica a l'adòto ancheuj tant an Algeria che ant le Filipin-e, giusta mach për fé d'esempi.
A l'é nen necessari esse n'òja për capì costa situassion. I soj ch'a l'han nen capila, o mej ch'a fan finta 'd nen capila, a son ij nòsti resior ëd la Comun-a 'd Turin, giusta mach për resté a nòsta ca e scrive 'd quaicòs ch'i conossoma bin. Nòsta sità a l'é satìa 'd maometan. Maometan che ambelessì as compòrto con prepotensa e strafotensa. Maometan che, për boca 'd sò "Iman" a diciaro tuta soa solidarietà a l'integralism islamich ëd Bin Laden. Maometan che, ant ël Consèj comunal passà, a l'avìo 'n sò rapresentant ch'as genava nen a parlé arab ant la ca 'd nòsta Comun-a. Maometan ch'a pretendo d'avèj soe moschée, sò bagn turch, soe scòle coraniche e la facoltà 'd massé le bes-ce ch'a mangio second le regole afrose anponùe da soa religion.
E nosta ministrassion lì, an sl' "atenti" pronta a deje tut lòn ch'a veulo, e ancor ëd pì, giusta mach përchè gnun a peussa deje dël rassista.
Tòpa! Nosta ministrassion a considera nen che ant ij pais islamich a fan dë spedission punitive ant le cese cristian-e për fé ravagi dij fidej andàit a mëssa; a considera nen che, ambelelì, se un a diciara d'esse cristian a finiss al croton giusta mach për esse sigur ch'a peussa nen fé 'd proselit e a j' passa gnanca për ël servel ch'a sarìa giust traté lor coma che lor a trato noi. La question a l'é n'àutra.
La polìtica a j'ampon ai politich d'avèj la vista curta. Na vista ch'a vada nen pì 'n là dj'elession a vnì.
E antlora a considero mach che ancheuj ij maometan a son na minoransa e, s'i voroma dila tuta, na minoransa, tut somà, miserabil; na minoransa pronta a deje 'l vot a la mancin-a ch'a governa la sità a condission che costa mancin-a a la trata bin. E nòsta mancin-a sitadin-a a la trata pì che bin a tut dëscapit dij piemontèis genit.
Contut a l'é peui nen che la drita ch'a governa lë stat a sia tant mej: a l'é përfetment alinià con la drita mondial, cola ch'a rapresenta la neuva religion che, bele con tuti ij vir ëd propaganda fàit dal Papa, a l'é an tren a sostitì la religion cristian-a: la religion del "dio dòlar", dont la fonsion liturgica pì anportanta a l'é l'esercissi dël consumism.
Për costa religion a l'é essensial che la gent, dedlà e an pì dle taje, dle "una tantum" e dle bale vàire as costuma na vira 'd pì a tiré fòra 'd sòld, sempe e an qualsëssìa manera e, dzortut, a tireje fòra për "solidarietà".
Solidarietà: bela paròla ch'a toca 'l cheur.
As cheujo 'd sòld da deje a la Cros Rossa, ch'a cata 'd provianda e 'd meisin-e da deje ai cit afghan, coj bombardà da j'avion merican, e a buta la ròba catà ant ij sò magasin. Ch'a son bombardà e dëstrovù, ëdcò lor, da j'avion merican ed cola Merica ch'a l'avìa anandià l'archeuita dij sòld.
A-i é da dì contut che 'l but prinsipal, col ëd convince la gent a tiré fòra ij sòld a l'era già stàit argionzù.
Television e giornaj a l'han capì, a la finitiva, che costa a l'é na guera 'd religion, na guera ch'as combat fra la religion maomentan-a ch'a veul conquisté 'l mond për eufrijlo a Allah e la religion dël dòlar ch'a veul conquistelo për fene 'n mërcà.
Qualsëssìa dij doi ch'a vagnerà, la gent ëmnùa, cola dla stra, cola ch'as contenterìa 'd vive e 'd travajé an santa pas, a l'avrà perdù.
Ardì piemontèis.
Beppe Burzio