Beppe Burzio/Ij silensi

Da Wikisource.
Jump to navigation Jump to search

Artorn a la Tàula


Ij silensi
 
A-i é 'l silensi dël ghignon
sensa remission,
ël silensi dla bin
sensa dimension
e col dël dolor
dij sangiut, dël magon.

A-i é 'l silensi dij pensé
ch'a l'han nen spiegassion,
ël silensi dij mat,
sensa solussion
e 'l silensi dij pòver,
pien ëd maledission.

A-i é 'l silensi tragich
ëd la sotmission,
ël silensi dij vej,
sensa ilusion
e 'l silensi dij mòrt
ch'a dëstissa la fiusa
'd nòsta resuression.