Beppe Burzio/El gabian

Da Wikisource.

Artorn a la Tàula


ËL GABIAN
 
Sol
contra 'l sol
ëd l'ambrun.
Aut
ëdzora 'l mond
cit e afanà.
Frem,
j'ale teise
a cheuje
l'ultim frisson
dla giornà
ch'as na va.
Bel, maestos, dësgenà
it im arciame a la ment
ël respir
che di dòpo di
la vita an pija:
la fantasìa.
Për tera,
an sla sabia
voita
che l'onda
a sgiafela,
col pass gòf da òca
e 'l crij dësperà
ch'a të squarsa
la garzamela,
it im arcòrde 'l calvari
che di dòpo di
la vita an da:
la realtà.
 
Beppe Burzio (1989)