Annamaria Rabino/Coma un siri 'd Natal

Da Wikisource.
Jump to navigation Jump to search

Retro


Coma un siri 'd Natal[modifiché]

Anvelenà giumai son eve e aria,
tòst erbo e fior a dventeran ëd pera,
pì ràire j’orme dl’òm
sla stra dël sentiment,
ma fosonante ant la pàuta dël vissi.
Man sassin-e a fan luse
ël cotel ëd Càin...
A l’é trionf ëd bòria e prepotensa.
Arme infernaj as pàiro,
bombe e mitraje a brajo:
grigna la Mòrt!

con j’ale ansangonaje
a gëmm la colomba dla Pas...
Visual ëd deul,
l’orisont l’é marcà da nìvole sombre,
mentre a s-cionfa d’angossa ’l cheur dël mond.
E, mi, coma ’n siri ’d Natal
ch’a vija
- brusand e lacrimand ant la neuit Santa -
i pioro
’n suplicand la misericòrdia ’d Dé
e arfudo ’d dësmorté
la fiàcola dl’amor e dla speransa.

ANIN

da «Vers ël seren», editor Ca dë Studi Pinin Pacòt, Turin, 1995