Anna Maria Rimondotto/L'isola ch'a-i é nen
L'isola ch'a-i é nen
[modifiché]Dedicà ’dcò a mi
Sempe mi i serco un pòst pròpi përfet
dova splendid e bel a lus l’amor,
j’euj a rijo tranquij sensa dolor
sël ciàir ëd na matin sensa difet.
Cert da tròp temp i l’oma ’l làit a pinte
për tùit ij poj, badòla e falabrach,
ma pì che tut ël cheur a l’é tant strach
ëd coj bigat ch’a vivo mach ëd finte.
Tròp bel a l’é pensé a j’euj seren
ëd na masnà, l’istant përfet dël gieugh
ch’as deurb sla fior content sensa velen
lìber e san c’me na bestia servaja,
un pòst dova esse e smijé sensa truch
cert a son face dl’istessa midaja.