Anna Maria Rimondotto/An mes a j'autin

Da Wikisource.

Artorn


An meds a j'autin[modifiché]

– St’invern a fiocherà, varda le cane
a l’han ëd bej piumèt ch’a biauto al vent, –
tèra dorà dova la vos as sent
ëd faje, strìe e masche lontan-e,

antant l’otogn ch’a scursa le giornà
dantorn a scauda ël fià dij misteri
e mi im domando da dova diavleri
a ven-ne fòra adess ste folairà

antant che ij nòstri pass a serco ’l mar
tra ròche e cuchije spatarà,
ma peui i treuvo con j’amis pì car

-squasi che minca ’d noi a sia na strega-
ant un bicer d’Arnèis tòst dëstopà
ël fil d’assel che ògni còsa a lega.

Da Baussé d’Alba a Monteu Roé, 21 d’otóber 2012