Anònim/La creassion dij Piemontèis
La creassion dij Piemontèis
[modifiché]El Creator al sest dì, a l'era alvasse bonora e a l'avia ampastà l'òm a la fomma prima ch'as fèissa di.
Adam a l'era piasse sùbit na cheuita soagnà d'Eva e, quand a l'è alvasse ‘l sol, a l'avìo già faàit la frità.Antlora le giornà a j'ero motoben pì longhe ‘d lòn che a peusso esse ancheuj, mentre tut el rest as fasìa motoben pì an pressa.Sòn per dì che, prima che a je spontèissa'l di che a fè set e prima che Nosgnor a tachèissa l'arpòs, an sle rivere dj'anviron a-i furmiolavo già na mesa dosen-a ‘d tribù.
E gnente a sarìa se a fussa nen che as cimentavo, as ghemmonavo, as busticavo,as si fin-a che minca na tribù a l'avìa già trovà sò Cain per forgè j'arme e ussè le pere. A l'è stàit a sta mira che San Michele a l'è andàit dal Creator e a l'ha dije: " Pare Sant, mi sai che Voi i feve tut da bin e iv ciam scusa! ma, guardand giù ant le vaj del mond, i veddo che le rasse ‘d gent che i l'eve butaje andrinta a son rasse malgrassiose e cagnin-e.
Perchè, Nosgnor, i cree nene na rassa con un pò ‘d lolà ant la testa ? Na rassa che, sensa ciaramlè tant,a s'angigna a butè un pò d'ardriss an sla tèra. Na rassa ch'a-j mostra a cudì ij camp e le vigne, a ten-e le piante a ij pra. Na rassa ch'a sapia a travajè per lor e per j'àutri e che, a temp e ora, a sapia ten-e e mnè ‘l baston ?".
El Creator, che a l'era già butasse le pantofle ant ij pè e la scufia an testa, coma as costumava antlora, a l'avìa scotà San Michele con la boca ambajà. Pì ‘l temp passava, pì as sentìa content d'avèj creà n'Angel così an piòta e antivist.
E, alvandse an s'una nìvola, a l'avìa vardà giù vers la gusaja che a seguitava a fesse ‘d despresie e a possognesse: " Tirte an là! , Sì a l'è mè!, Son rivaje prima mi!".
A l'era virasse desgustà, rissand el nas e sopatand la testa. " A venta pròpi che i fasso n'autrà rassa, coma it dise ti! Ma na rassa che a l'abia la testa sel còl!
La testa sel còl, nopà che sle spale coma tuti j'àutri! Na rassa ch'a s'angigna, ch'a buta d'ardriss, ch'a cudissa, ch'a travaja per lor e per j'àutri! "
E ‘l Creator e l'era calà sle montagne e, con la tèra nèira, l'eva ciàira, el sol foà, la ròca dura, a l'avìa fàit la rassa piemontèisa con la testa sel còl.
" Và e travaja, butand giudissi per tuti!......" a l'avìa dije al prim piemontèis.
Ma, ant la pressa, Nosgnor a l'è desmentiasse ‘d deje ‘l bastion da ten-e e da mnè.
A l'è parèj che ij piemontèis a son ancora bele ancheuj coma a l'ha faje Nosgnor! A travjo per lor e per j'àutri, butand giudissi per tutti.
El mal a l'è che coj che a l'han la testa sle spale a l'han seguità a ten-e e a mnè ‘l baston sla schin-a dle ciole che a l'han la testa sel col.