Anònim/L'orsòt Scarabòcc

L'orsòt Scarabocc

A l'orsòt Scarabòcc a-j pias un përfond scarabocé. Con ij sò crajon colorà a dissegna tut lòn ch'a s-ciàira.
Un dòp-disné, Scarabòcc as dis: «I dissegnërai mè frel grand.» A va ant la stansia e a s-ciàira sò frel sgobé, da stërmà, doi bombon tuti ariond. Antlora, a sern un crajon e a sbòssa n'orsòt tut ross. Ant ël còl, a dissegna doi riond... Peui a mostra ël dissegn a sò frel. Ma chiel-sì a lo pija 'd bala:
- Lòn ch'a l'é, sossì, costi doi bolè ross? Ij bolè a chërso pa an sël còl! Che scarabòcc!
- T'ses ti, a-j rëspond Scarabòcc tut fier. T'ses ti cand i të sgòbe da stërmà doi bombon tuti ariond.
Daré dla pòrta, maman a rij, përchè a l'ha sentù tut.
«Adess, as dis l'orsòt, i scarabocc-rai mè papà gigant.» Scarabòcc a va ant ël salon. Papà a l'é an camin ch'a les sò giornal, e dagià ch'a chërd d'esse tut sol, as buta ij dij ant ël nas. Scarabòcc a tira fòra la lenga. A l'é un papà gigant, a l'é longh da copié! A scarabòcia n'ors ëstragròss, tut groson, con na gròssa bala për nas. An sla bala, a dissegna doi paloch ch'a smijo a dij tronch d'erbo. Peui a mostra sò dissegn a papà. Ma chiel-sì a së sbaruva:
- Lòn ch'a l'é, sossì, costi erbo groson? J'erbo a chërso pa an sël nas! Che scarabòcc!
- T'ses ti, a-j rëspond l'orsòt, un pòch delus. T'ses ti cand ch'it bute ij dij ant ël nas.
Maman a rij coma 'n fricandò, përchè a l'ha sentù tut.
Ma Scarabòcc a l'é trist. Gnun a capiss mai gnente dij sò dissegn... gavà miraco maman. A-j mostra soe scarabociade e a-j ciama:
- Lòn ch'a l'é sòn?
Maman a rij e a rëspond sensa falisse:
- Chiel-sì a l'é tò frel grand. A sgòba doi bombon!
- E sòn, lòn ch'a l'é?
- Chiel-sì a l'é tò papà. As buta ij dij ant ël nas!
Peui a ciama, un pòch anchieta:
- E mi, Scarabòcc, 'me chi son?
L'orsòt Scarabòcc a arflet. Peui as visa che a ca tuta la famija a speta na cita seur.
Antlora, a scarabòcia n'orsa motobin granda e motobin bela, con na pansa a balon e, andrinta, a dissegna un cit pòis tut ariond.
- Costa it ses ti, maman, con la cita seur.