Anònim/Ij color dël camaleont

Ij color dël camaleont

(conta d'Àfrica)

Tante e tante lun-e fa, j'esse vivent a j'ero parèj dël vent, a cangiavo ëd pòst al pì cit sofi, strusiand da sì, rampiand da là, sempe ëd passage. Cand che un a vorìa fërmesse për pì 'd temp, a l'era arbutonà, possonà via da j'àutri.
Lë Spìrit Bon, ch'a s-ciairava tut sòn ëd n'euj fastudià, a l'ha riunì tuti j'esse vivent an sla Tèra e ant ij cej.
- Mè amis, a l'ha dit, vojàutri i vive coma 'l tifon, la testa al contrari. I seve nen andoa deurme, andoa mangé, andoa gieughe. I veuj dé a mincadun ëd voi un pòst, an sla Tèra o ant ij cej, ch'a sarà sò alògg.
Òm e animaj, tuti a l'han aprovà lë Spìrit Bon. Ëdcò lor a n'avìo a basta ëd virolé an etern a travers Tèra e cel.
- Diseme donca anté ch'i desidereve vive, a l'ha dit lë Spìrit Bon.
L'òm a l'é avzinasse.
- Dame na ca e un camp, a l'ha ciamà.
Lë Spìrit Bon a l'ha fàit ëd sì con la testa an soridend.
- It j'avras, òm.
Peui a l'han defilà j'animaj, l'un apress a l'àutr.
- I vorërìa vive ant ël cel.
- Mi i veui la sombrura dla foresta.
- Lass-me strusié sot-tèra.
Për j'un, a l'era la savan-a o le dosse colin-e, o ancor l'eva dij fium, ij lagh, ël mar. D'àutri a sustavo dle sime a strapiomb o dle raisure ancreuse. Tuti a l'avìo na preferensa e lë Spìrit Bon a aprovava con la testa. La Tèra e ij cej a j'ero tant ëspantià!
Tòst mincadun a l'ha parlà conforma a sò desideri. Sol antra j'esse vivent, ël camaleont a l'era restà ciuto. Lë Spìrit Bon a l'é sburdisse.
- Tl'has nen sernù toa ca, Camaleont?
L'animal a smijava esité. A l'ha finì për dì con na vos ësbaruvà:
- A l'é che a mi, t'sas, costa vita da vagabond am va bin. Am pias abité daspërtut e da gnun-e part.
Lë Spìrit Bon a l'é butasse a rije.
- T'ses n'animal dròlo! Ma va bin! Mincadun a l'ha ël drit d'abité conforma a sò cheur e anté ch'a jë smija mej, Camaleont.
Da costa época, j'esse vivent as son partagiasse la Tèra, j'eve e ij cej. J'animaj a coro an sla savan-a, a dzorvòlo la foresta, a novo ant ël fium. E l'òm a viv an soa ca, sircondà dai sò camp.
Quant al camaleont, chiel a l'é a soa ca daspërtut. Cand ch'a sàuta an sna feuja vërda, a ven verd. S'a talòcia an sël branch, a l'é gris coma chiel. Përchè, pensé un pòch, a cobia soa pel con tuti ij color dël mond, ël camaleont.