26 d'avril 1945

Da Wikisource.
Jump to navigation Jump to search

Artorn



26 d’AVRIL 1945[modifiché]

I l’hai durmì ant lë bàite dla montagna

dal feu ‘d na rama d’arbra mal ëscaudà.

Preparme  ‘l let ëd lan-a… i torno a ca.


I l’hai mangià pan sech e ‘n tòch ëd formagg

che quèich bërgé  ‘d bon cheur a l’ha donà.

Buta an sël feu  ‘l bujì… i torno a ca.    


I l’hai beivù con un bicer ëd tòla

tnì con le man frèide l’eva giassà.

Va  ‘n cròta a pijé na bota… i torno a ca.


I l’hai scrivù con un tòch ëd giss dë scòla

ëd neuit an slë muraje “LIBERTÀ!”.

Pronteme piuma e anciòstr… i torno a ca.


I l’hai marcià sù e giù për mulatere

con ij pé strach ant ij scarpon ciodà.

Lustra mie bele scarpe…i torno a ca.


I l’hai vestì majon ëd lan-a gresa

e ‘n fassolet dël còl tut ëstrafognà.

Stirme croate ‘d seda…i torno a ca.


I l’hai scotà triste canson ëd guèra

e rèquiem për ij mè frej massà.

Buta su ‘n disch ëd Vivaldi…i torno a ca.


I l’hai vivù odiand nòsti nemis,

empiend ëd malvolèj minca giornà.

Ten pront un gest d’amor… i torno a ca.