Introdussion a l'evangeli scond Luca

L’evangeli ‘d Luca a l’é ‘l ters dij quatr evangej canònich dël Testament Neuv ëscrit ant ël perìod an tra ‘l 64 e ‘l 70 AD. La tradission cristian-a a dëspiega che sò autor, Luca, a l’era ‘n compagn ëd l’apòstol Pàul e medich ëd profession. Cost evangeli a l’é adressà a “Teòfil”. A podrìa esse ‘n cristian giovo ‘d nassensa greca pròpi coma Luca (ch’a l’era nen n’Israelita) e ch’a l’avìa da manca ‘d na conossensa pì bon-a dla vita e dl’euvra ‘d Gesù Crist ëd lòn ch’a-i j'era a disposission ‘n col temp là dasendje na richëssa ancora pì granda e con në stil leterari grech pì bon e soagnà. Anlora Luca, coma chiel midem a dis ant l’introdussion, as pija l’incombensa ‘d provëdd-la. Teòfil a podrìa ‘dcò esse ‘n nòm simbòlich ëd coj che Luca a veul feje rivé soa euvra. Parèj, Luca a fà n’arcòlta ‘d tute le testimonianse certe ch’a treuva e ch’a vnisìo dirèt da coj ch’a l’avìo conossulo ‘d përson-a, ch’a l’ero dventane dissépoj e jë spantior ëd sò mëssagi. A coste testimonianse, peuj, Luca a-j buta n’ardriss didàtich. L’evangeli ‘d Luca a l’é ùnich an vàire manere. A l’é ‘l sol evangeli ch’a buta ansema na conta detalià dla nassensa ‘d Gesù, coma ‘dcò na narassion longa dij viage ‘d Gesù për la Giudèa e la Galilea, ëd sò ministeri, patiment, mòrt e arsurression. Luca a inseriss un nùmer ëd paràbole ch’as treuvo nen ant j’àutri vangej, coma cola dël bon samaritan e dël fieul ësgairon. L’ènfasi la pì amportanta dl’evangeli ‘d Luca a l’é an sla compassion e l’amor ëd Gesù. Luca a pitura Gesù coma ‘n meisinor compassionos dël còrp e dl’ànima ch’a va ‘ncontra ai pòver, ai malavi e a coj ch’a son dëspresià e lassà da banda da la società. Chiel a armarca ‘dcò l’importansa dël përdon e dla misericòrdia. L’evangeli ‘d Luca a l’é ‘n mëssagi dë speransa e ‘d salvëssa për tute sòrt ëd përson-e, a fà nen da ‘nté ch’a rivo. L’evangeli ‘d Luca, parèj, a l’é na stòria bela e d’ispirassion ëd la vita ‘d Gesù Crist, un mëssagi dë speransa për tuti e ch’a cissa ij chërdent a ‘ndeje dapress a sò esempi e ‘d nunsié sò mëssagi ‘d redension al mond.