Tòni Rolon/Nòstre manere 'd dì

Artorn

---

Nòstre manere 'd dì

Quand ch’a fasìa temporal ij vej piemontèis
a disìo, e an vàire a lo diso ancora, «Santa
Barbara e San Simon ch’an guèrno da la
lòsna e dal tron», n’invocassion ch’a l’ha ’n
rëscontr ant ël provensal «Santa Barbara e
San Simoun liberamen dòu troun». Còsa
ch’a-i é a l’adoss ëd costa sùplica? Santa
Barbara, as sà a l’era stàita acusà da sò
pare d’esse cristian-a (a j’ero j’inissi dël sécol IV)
e dal midem pare giustissià. Ma sùbit
dòp na lòsna a l’avìa ansën-nrì ’l pare
disuman. Cost aveniment a l’ha alvà Barbara
al ròlo ’d patron-a dj’artilié, dij mineur
e dij pompista; nen mach ma sò nòm a ven
assegnà al depòsit ëd monission ëd le nav.
Costa màrtir a l’é un-a dij 14 sant ausiliador,
coj che a soa antercession arcorìa ’l pòpol
cristian an particolar necessità: Barbara
contra la lòsna, coma San Bias për ël mal la
gola, San Gili për ël pànich, Sant Erasm për
le maladìe dl’intestin, San Vì për la corea
(con la c cita) e l’idrofobìa e vìa fòrt. Për
lòn ch’a rësguarda San Simon, a l’era un
ëd j’apòstoj e a l’era stàit martirisà an sla cros
an Persia. A arsulta gnun-a anlìa con lòsna o
feu, e tut a lassa pensé che sò nòm a sìa
butà ’nt la giacolatòria për via dla rima.
Na vira, as sà, as fasìa motobin cas a le
rime o almen a j’assonanse. Na cita
arcompensa për cost apòstol, an sconda linea
rispet a l’àutr Simon, col Bar Giona, venerà
coma guardian dël Paradis.