Remo Bertodatti/Nosgnor «Grand Òm» l’é sì an cost «Gran Dòm» con mi

Artorn

---

Nosgnor «Grand Òm» l’é sì an cost «Gran Dòm» con mi

Miraco ’l miràcol a l’é lì
’nt la veuja ’d se quatr pere ’d tense an pé
për deje sosta a Dé
aranda a jë scalin dla mulatera:
na scala ’d pera vers ël Paradis...
Ij «Batù gris» ëd la Confrarìa dij fò
a stiro ancontra al cò dël cuèrcc ëd lòse
ij brass dij branch an segn d’adorassion
e ’n ginojon a prego...
Si-si, lo sai:
«Nosgnor l’é daspërtut!»
Ma ’n bele sì
mi i lo sento ’d pì...
Sì, anté che ’l vent,
bufanda drinta jë strument dël bòsch
a crea mùsiche...
E siale, grì, ciricicì e cardlin
a canto ’l Bin
al son ësclin dël ri
che, neuit e di,
a sgrun-a Ave d’eva...
...
Sël pavajon ëd feuje
na man ëd verd ëscur
e, drinta ij beucc, l’asur...