Pinin Pacòt/A Arnaldo Soddanino
AL POETA ARNALDO SODDANINO ARSEIVEND SO LÌBER[modifiché]
«A l’ombra ’d mè cioché»
Car Sodanin, che a l’ombra ’d tò cioché
’t festegie ij cinquant’ane ’d poesia
mi son mach un galèt con la puvìa
ma a le toe nòsse d’òr i veuj canté.
Veuj canté la toa lauda a garabia
për mont e pian, për rive e për senté,
tant che le ciòche a taco a ciocaté
da tò cioché ch’a strambìa d’alegria.
O Sodanin, ardì come un cardlin
ëd piume grise ma con ël bech dur
ch’a scriv ancora «amor» sël feuj dl’azur:
tente ai branch àut e scàuda un nì ’d basin
për toe nòsse ’d diamant còtie ’d boneur
con la Musa ’d Turin ch’at rij an cheur!
Roma, 13 magg 1949
Pinin Pacòt an Leturil da Ij Brandé Giornal ëd poesìa piemontèisa N° 106 ~ 1 Fervé 1951.