La mia patria l'é sla montagn a[modifiché]

Novèmber 1943
A mè fieul Mario e a tùit ij Partisan dla Val Chison

La mia patria l'é sla montagna
l'é sla montagna sarvaja
con j'Alpin ch'a deurmo sla paja
con ij soldà sensa pan e sens’arma
ma con l’anima fiera
përchè a l’han nen tradì la bandiera.
La fiòca a-j coata e la frèid a-j flagela
e la tormenta a jë sgiaflela
e la miseria a-j compagna:
La mia patria l'é sla montagna

La mia patria l'é sla montagna
lontan da sto mond ch'a mercanda
na grupia, 'n bindel, na coron-a;
da sta gent lasaron-a
ch'a-j lustra le scarpe al tedesch ch'a comanda,
da sta rassa falìa
che për quatr sòld a fa la spia
e a conta con l'ànima 'd Giuda
ij tranta scu ch'a guadagna:
La mia patria l'é sla montagna

La mia patria l'é sla montagna:
l'é ansema ij pi giovo e ij pi fòrt
ch'a sfido la fam e la mòrt
përchè l'Italia sia viva,
l'é ansema ai bandì dla miseria,
l'é ansema ai farchèt dla speransa,
l'é ansema a j’Alpin dla vitòria
ch'a speto n'ùltima glòria
da na pi giusta campagna:
La mia patria l'é sla montagna

Corage, fieuj dla montagna!
dëdsà i'é quaicòs ch'a ruin-a
dëdlà i'é quaidun ch'a s'ëvzina,
e l'ora l'é gnanca lontan-a
ch'i vëddo sij brich e sla pian-a
l'Italia ch'a torna italian-a
Tornoma a pianté, sle frontiere
nòste, le nòste bandiere
e che Nosgnor an compagna!
La mia patria l'é sla montagna