La Bibia piemontèisa/Testament Neuv/Filipeis/Filipeis 1

Da Wikisource.
Jump to navigation Jump to search

Filipèis[modifiché]

1[modifiché]

1Pàul e Timòt, servitor ëd Gesù Crist, a tùit ij sant an Crist Gesù ch'a son a Filippi, ansema ai sovrintendent[1] e ai diàcon. 2Grassia e pas a voi da Dé, nòst Pare e dal Signor Gesù Crist.

Preghiera për la cesa 'd Filippi[modifiché]

3I ringrassio mè Dé tute le vòte ch'i faso mension ëd vojàutri. 4A l'é sèmper con gòj ch'i prego për tùit vojàutri an minca mia orassion, 5për càusa 'd vòstra partecipassion[2] a l'Evangeli dal prim dì fin-a a adess. 6I son sicur ëd sòn: che col ch'a l'ha comensà 'n voi costa euvra bon-a, a-j darà compiment[3] ant ël Di ëd Crist Gesù. 7A l'é mach giust ch'i penso parèj ëd tuti voi, përch' i seve an mè cheur, dàit che sia an mie caden-e[4] che ant la difèisa e la confirmassion dl'Evangeli, tuti vojàutri i seve dventà mè compagn ant la grassia 'd Nosgnor. 8Nosgnor a m'é testimòni coma ch'a l'é përfonda mia afession an Crist Gesù për tuti voi. 9E i ciamo sta grassia, che vòstr amor a sia sèmper pì grand[5] ant la conossensa e ògni sòrt d'inteligensa[6] 10parèj ch' i dësserne lòn ch'a l'é mej e sìe pur e sensa rimpròcc pront për ël Di 'd Crist, 11pien dël frut ëd la giustissia ch'a ven da[7] Gesù Crist a la glòria e làude 'd Nosgnor.

Ël ministeri d'un përzoné[modifiché]

12I veui ch' i sapie, mè frej e seur, che le còse ch'a son rivame[8] a son pitòst arzultà për l'avansament ëd l'Evangeli. 13Tuta la guàrdia imperial[9] e tùit j'àutri a l'han savù ch' i son stàit butà an përzon për Crist, 14e pròpe a motiv ëd mie caden-e, la pì part ëd nòstri frej e seur an Crist as ancalo adess a nonsié la Paròla con motobin ëd pì d’ardiman e sensa pàu.

15A l'é vera che quaidun a predica Crist mach për invidia e për fé 'd polémiche, ma d'àutri a lo fan ëd bon-a volontà, 16për amor, përché a san ch'i son stàit butà ambelessì për la difèisa dl'Evangeli. 17Ij prim, nopà, animà da në spìrit tachignos, a nunsio Crist për dij motiv ch'a son nen pur e mach con ël pensé 'd feme 'ncora pì tribulé 'nt mie caden-e. 18Am na fà gnente: an tute le manere, o për ostentassion o për amor ëd la vrità, Crist a l'é nunsià e 'd lòn im arlegro. Éh, i seguiteraj a arlegreme, 19përchè i sai che sòn a arzulterà ant mìa liberassion për ël mojen ëd vòstre preghiere e con l'agiut ëd lë Spìrit ëd Gesù Crist.

20Mia speransa pien-a 'd fiusa a l'é ch'i l'avraj mai a vërgogneme, ma che 'd sicur Crist a sarà adess com a l'é sèmper stalo, glorificà ant mè còrp, sìa për la vita che për la mòrt. 21Për mi 'l vive a l'é Crist e 'l meuire a l'é 'n guadagn. 22Ma s'a l'é ùtil për mia euvra ch' i seguito a vive ant ël còrp[10], dabon i savrìa propi nen còsa serne. 23I son pressà da le doi part: s'a fussa për mi, i sarìa bin pront a dëslogé e d'esse ansema a Crist. Costa-sì a sarìa la còsa motobin pì bon-a, 24ma a l'é pì necessari për vojàutri ch'i resto 'nt ël còrp. 25Dàit ch' i son sicur ëd lolì, i sai ch'i resteraj e seguitaraj a sté con tuti vojàutri për vòstr avansament e goj ant la fej, 26parèj che lòn ch'a fà vòstra fierëssa a peussa chërse an Crist Gesù për motiv ëd mi, quand ch'i artornaraj tra 'd vojàutri.

27Comporteve mach an manera degna dl'Evangeli 'd Crist, parèj che tant ch'i ven-o e ch'iv vëdda coma ch'i ven-a pi nen, i senta ch' i ten-e dur ant un medésim ëspìrit e na sola ment e ch' i combate fianch a fianch për la fej dl'Evangeli, 28sensa mai esse antimidì dai vòstri aversari. Cost-sì a sarìa 'n segn[11] ëd soa distrussion[12], ma për vojàutri un segn ëd salvëssa - un segn ch'a ven da Nosgnor. 29Përchè a l'é stàit acordà a vojàutri nen mach ëd chërde a Crist, ma 'dcò 'd patì për chiel, 30dàit ch'i susten-e l'istess combatiment ch'i l'eve vëddume afronté e ch'i sente ch'i l'hai da afronté adess.

Nòte[modifiché]

  1. O "vësco", "sorveliant".
  2. I cristian ëd Filippi a l'avìo sèmper sustnù l'Apòstol an sò ministeri ëdcò da la mira finansiaria.
  3. O "a la rendrà përfeta", "completa".
  4. O "detension".
  5. O "bondos".
  6. O "cognission", "disserniment".
  7. O "për ël mojen ëd".
  8. Mia situassion.
  9. Let. "ël Pretòri".
  10. Let. "Ant la carn".
  11. O “na dimostrassion”.
  12. O “perdission”.

Artòrn a la Tàula dla Bibia