Gemma Cattero/Làuda matutin-a

Da Wikisource.

Artorn

Làuda matutin-a[modifiché]

A son ij passaròt
le prime creature
a dé 'l bondì a Nossgnor!
Sle ròche dla montagna
trames ai castagné
i-é tut un ciosoné
d'oslèt ch'a tërlo 'd gòj.
L'é bel scoté sta làuda
a la matin bonora
pen-a che l'alba a sponta
là vers la pian-a ...
Prima sotvos, dosman
a smìo ciaramlé
quand che le nijà as dësvìjo,
peui adasiòt s'acòrdo
un gasojé festos
quasi na sinfonìa
pija l'andi, a s'àussa, a chërs
d'un-a dòsseur arcan-a...
La val a deurm ancora
ij prà a përfumo 'd fen
e costa sì a lé l'ora
pì giusta për preghé ...
Peui ël concert s'acheta
sla fin as pàsia
e mut a speta
ch'a riva dì...
An sl'orizont
là vers Turin
ël sol a nass...
Un bochetin ëd liri
a s'anlumina d'òr.
Un apress dl'autr s'ambajo
j'uss ëd ca
e l'òm a seurt
për andé a pié 'l travaj...
N'àutra giornà a s'anàndia
sia làuda a Ti
mè Creator
t'adòro
e t'eufro tuti ij moment
dla vita che t'am das
come 'n bochet ëd fior
frësch ëd rosà
për dite mè " mersì"
Sia lauda a Ti!