Angela Ferraris/L'amicissia
L'amicissia[modifiché]
Ant una ca abando na minca stagion a l'ariv dl'invern, un gratin e 'n rat a j'ero trovasse soj con ëd proviste bondose, a l'avìo già girà tuti i canton e studià tuti ij përtus, as sentìo pì nen genà e a l'avìo fàit amicissia.
A giugavo tra 'd lor e 's divertìo e 'd vòlte 's dësmentiavo fin-a 'd mangé, la bon-a companìa a smijava 'mpinì la pansa.
Cola sèira ël gat a l'era andurmisse con ël cheur pien d'argiojissansa ma quandi ch'a j'era dësvijasse a l'avìa pì nen trovà ël rat.
N'àutr rat ch'a j'era intrà da quàich përtus o da quòiche filura a l'avìa contaje che ij gat a j'ero ij sò nemis e 'l nòstr rat a l'era sentusse 'l cheur a bate antramentre cola vos arbombava "Tuti ij gat a son iustess", ansoma, a l'avìa contaje tante 'd cole drolarìe che a la fin a l'era scapà vìa spaventà. Ël gat adess a l'é dventà 'n gaton, i savrìa gnanca pì dive vàiri rat a l'ha mangià 'n soa vita.
A l'ha mangià anche ël ratin ëd la nòstra stòria? Ciamèjlo nen, av dirà che "tuti i rat a son istess".